— Еңбек жолыңыз неден басталды?
— Бастапқыда мен сол кездегі көптеген студенттер сияқты өзіме қандай мамандықты таңдарымды білмедім. Десе де маған өмірде көптеген адамдармен жүздесу бақыты бұйырды. Олар менің мамандық таңдауыма көмектесіп, осы салада өзімді табуыма жол ашты. Осылайша мен «Жылу энергетикасы» мамандығын таңдадым, ал сол адамдар менің тәлімгерлерім мен ұстаздарым болды. Олар маған қарапайым жұмысшы ретінде еңбек жолымды бастағанымда, көп көмектесті. Тіпті қазірдің өзінде бірінші басшы болсам да, олар менен ақыл-кеңестерін аяған емес.
Өзімнің еңбек өтілімді 2001 жылы қарапайым қызметкер ретінде бастадым, кейін барлық кезеңнен өттім – бірінші қазанның машинисінен бастап, өндірістік бөлімнің басшысы, бас инженерге дейін көтерілдім. Қазір мекеме директоры қызметіндемін.
Менің қызметтік өсуімдегі маңызды оқиғалардың бірі өндірістік бөлімнің басшысы ретіндегі тәжірибем болды. Онда мен өзімнің мүмкіндіктерімді өндірісте ғана емес, әкімшілік тұлға ретінде де сынап көрдім. Жоғарыдағы басшылық менің басқарудағы қабылетімді көріп, маған бас инженер қызметін ұсынды.