Аймақтардағы денсаулық сақтау деңгейін көтеру мақсатында Корпорация 2019 жылы Оңтүстік Кореяның жетекші клиникасы - «Северанс» госпиталімен медицина саласындағы бірлескен жұмыс және ынтымақтастық туралы Меморандумға қол қойды.

Ынтымақтастық аясында Жезқазған медициналық орталығының дәрігерлері және мейірбикелеріне тәжірибе алмасу, консультациялар мен тренингтерден өту мүмкіндігі берілуде. Өткен жылдың тамыз айында Оңтүстік Корея дәрігерлері оңалту апталығын ұйымдастырды, «Телемедицина» жобасы енгізілді, соның арқасында 2020 жылдан бастап «Северанс» дәрігерлерімен онлайн-консультациялар жүргізіліп келеді.

2019 жылдың қазан айынан бастап Сәтбаев қаласында денсаулық сақтау жүйесінің бірқатар ғылыми зерттеулері жүргізілді. Денсаулық сақтау саласындағы халықаралық деңгейдегі сарапшылар, ғылыми кеңесшілер, Облыстық денсаулық сақтау басқармасы мен «Қазақмыс» корпорациясының өкілдерінен құралған жұмыс тобы құрылды.

Нәтижесінде Сәтбаев қаласының денсаулық сақтау саласындағы ең күрделі мәселелер анықталды, 2021-2023 жылдарға арналған қала тұрғындарының денсаулығын нығайту мен сақтаудың бағдарламасы жасалып, облыс әкімдігімен келісілді.

Бағдарламаның бюджеті 5 млрд-тан астам теңгені құрайды. Қаржыландыру республикалық, жергілікті бюджеттің және «Қазақмыс» Корпорациясы қаражатының есебінен жүзеге асырылады.

Сәтбаев - аталмыш бірегей жүйелік тәсіл қолданылған еліміздегі жалғыз қала екенін айта кеткен жөн. Болашақта осындай бағдарламаны Балқаш және Жезқазған қалалары үшін әзірлеу жоспарланып отыр.

Сондай-ақ, компания әлемдік коронавирус пандемиясымен күреске белсенді атсалысуда. Корпорация компанияның кәсіпорындарында инфекцияның таралуын болдырмау үшін қажетті шараларды қабылдаумен қатар, Қарағанды облысындағы денсаулық сақтау мекемелеріне қажетті медициналық жабдықтарды, ЖҚҚ мен дәрі-дәрмектерді сатып алды.