Қазақ тілі енді Оксфордта оқытылмақ

Оксфорд университетінде магистранттар мен докторанттарға қазақ тілі оқытылмақ. Соның арқасында студенттер мен ғалымдар қазақстандық авторлар жазған ғылыми, әдеби және өзге де еңбектерді оқуға қол жеткізе алады.

Одан бөлек заманауи технологиялардың арқасында бүкіл әлемдегі контент қазақ тілінде және еліміздің тұрғындары үшін қолжетімді бола түспек. Ұлттық тілдің қолданыс аясы қалай кеңейіп жатқанын KAZ.NUR.KZ мақаласынан оқи аласыз.

Оксфорд университеті (Ұлыбритания) және Қазақстан Республикасы Ғылым және жоғары білім министрлігі қазақ тілін оқытуды бастау туралы келісімге қол қойды. Енді қазақ тілі Оксфорд университетінің құрамына енетін 35 колледждің бірі - Вульфсон колледжінде оқытыла бастайды.

Ұстаз ретінде А.Байтұрсынұлы атындағы Тіл білімі инситутының ғалым-лингвистері шақырылып отыр. Олар Англияда «Болашақ» бағдарламасы аясында бір жыл бойы жұмыс істеп, Оксфордтағы әріптестеріне қазақ тілін үйретіп қана қоймай, ғылыми біліктілігін де арттыруға мүмкіндік алады.

Қазіргі таңда қазақ тілі курсын болашақта да жалғастыру туралы келіссөздер өтіп жатыр.

Анар Фазылжан

Ахмет Байтұрсынұлы атындағы Тіл білімі институтының директоры

"Вульфсон колледжі лингво-мәдени контент түріндегі мәдени феномен, мәдениетаралық коммуникация құралы ретінде қазақ тілін оқытуға мүдделі болып отыр. Оқытушылар тілді оқыту әдіснамасын ғана емес, сонымен бірге тіл туралы ғылыми білімге ие болғаны маңызды".

Қазақ тілінің Оксфорд университетінде оқытылуы студенттер мен ғылыми қызметкерлерге халқымыздың тарихын, дәстүрлерін және менталитетін түсінуге мүмкіндік береді. Олар жаһандық әлемнің дамуына үлес қосқан қазақ мәдениетін тереңірек тани түседі.

Ынтымақтастық туралы келісімге қол қою кезінде ғылым және жоғары білім министрі Саясат Нұрбек ағылшындарға ел президенті Қасым-Жомарт Тоқаевтың тапсырмасымен жасап шығарылған қазақ тіліндегі алғашқы Оксфорд сөздігін сыйға тартты. Сөздікке 60 мың сөз енген. Оған қоса министр Саясат Нұрбек ЖОО-на қазақ тілін ағылшын ортада оқытуға арналған оқулықтарды да табыс етті. Олардың ішінде ағылшын тіліне аударылған оқулықтар, ғылыми оқу құралдары мен көркем әдебиет бар.

Қазақ тілі аясын кеңінен қолдану мемлекеттік саясаттың басым бағыты болып саналады. Қазақстанда жұмыс істейтін IT-алыптар жергілікті тұрғындарға ана тілінде білім алуға қажетті өзекті ақпарат алуға мүмкіндік беретін құралдар мен технологияларды үздіксіз жасап шығарып, енгізумен айналысып жатыр. Технологиялар сапалы білімді ауқымды аудиторияға қолжетімді етеді

Жұлдыз Кенжеғалиева

NUR.KZ порталының қазақ тіліндегі жаңалықтар бөлімінің басшысы

"Интернетті білім беру мақсатында қолдану – жаңа норма. Қазақстанда, әсіресе жастар арасында қазақ тілінде сөйлейтін адамдар қатары көбейіп жатыр. Студенттер мен мектеп оқушылары түрлі пән бойынша ақпарат іздеу үшін интернетті қолданады. Бұл ретте интернетте қазақ тіліндегі ақпарат өте аз және ол арқылы дұрыс жауап табу қиын".

Яндекс деректері бойынша ел тұрғындарының 2 миллионнан астамы күнделікті сұрау салады, ал әр алтыншы пайдаланушы сұрауды қазақ тілінде жасайды. Қазақ тіліндегі сұраулардың саны көбейіп келеді, оның көп бөлігі білім саласына қатысты.

Қазақстан тұрғындарының ана тіліндегі материалдарды зерттеу мүмкіндігін арттыру үшін Яндекс Іздеу қызметі ағылшын және орыстілді мақалалардың қазақ тіліндегі нейрожелілер арқылы аударылған аудармасын тауып беретін болды. Осылайша қазақ тіліндегі пайдалы материалдар саны 15 миллионнан астамға артты.

Ансар Анвари

Яндекс Казахстан, Іздеу өнімінің аға менеджері

" Шетел дереккөздерін аударуға мүмкіндік беретін технологиялардың арқасында пайдаланушылар өз тілінде әр саладағы контентті зерттей алады. Мәселен, «Википедияда» ағылшын тілінде 7 миллионнан астам мақала болса, қазақ тілінде мұндай мақалалар саны тек жүз мыңдай. Енді іздеу жүйесі қазақ тіліндегі сұрауларға шет тіліндегі мақалаларды тауып беріп, оларды автоматты түрде аударып береді. Бұл қазақтілді пайдаланушылардың іздеу мен аудармаға кететін уақытын үнемдеп, ана тілінде шетелдік материалдарды көбірек тауып, зерттеуге мүмкіндік береді".