Шағын демалысты өткізу үшін көрші елдер де қолайлы. Ол жақтарға сапар шегу соншалықты ұзақ емес және қалтаңызға салмақ салмайды. Алыс шет елдерге сапар шегуге қарағанда, көп бюджетті қажет етпейді. Бұл елдер мәдени демалыс үшін, бір орында отыра бермей, қыдыру, таза ауада серуендеу және табиғи өнімдерден ләззат алу үшін таптырмас нұсқа болушы еді.
Соңғы уақыттарда жып-жылы әрі колоритті елдер - Өзбекстан, Грузия, Армения, Әзірбайжан және Қырғызстан қазақстандықтар арасында ерекше танымалдылыққа ие болып жүр... Бұл елдердің барлығында қол жетімді бағалар бойынша ұлттық тағамдар, тарихи және табиғаты көркем жерлер жеткілікті. Қазақстандықтар үшін ол жақтарда виза қажет емес, сонымен қатар бұл жағдайда уақытыңызды, ақшаңызды үнемдей аласыз, жүйке жүйеңіз де тозбайды. Бұл елдердің бірнешеуіне көлікпен де жете аласыз, бірақ бәріне емес, сондай-ақ, автобуспен немесе пойызбен де саяхаттай отырып, біршама қаражат үнемдеуге болады. Саяхаттауға ең жақсы уақыт - наурыздан қазанға дейінгі аралық. Әйтпесе, басқа уақыттарда бұл өңірлерде біздегідей суық.