Бүгінде электромобиль ешкімге таңсық емес. Егер мұндай көліктер бірнеше жыл бұрын сирек кездесетін болса, қазір қазақстандықтар оларды үнемділігі және экологиялық таза болғаны үшін жиі таңдайтын болған. Автобрендтер желісін түрлендіріп, бұл екі шешімнен бөлек көлікті анағұрлым қолайлы ететін опцияларды назарға ұсына бастады.

NUR.KZ тілшісі қауіпсіздік, жайлылық және заманауи дизайнды өз ішіне қамтитын жаңа Geely Galaxy EX5 MAX электр кроссовер моделін сынақтан өткізді.

Тест-драйв жұмыс күнімен тұспа-тұс келді, сол себепті күнделікті жұмыстарды бітіре жүріп, автомобильді әдеттегі Алматы көшелеріндегі қарбаласты қалай еңсеретіні бойынша бағалай алдық. Ал демалыс күндері тауға барып, Geely Galaxy EX5 MAX көлігінің таулы жердегі жүрісін сынадық.

Geely Galaxy EX5 Allur-де екі - PRO және MAX комплектацияларында ұсынылғанын атап өту керек. PRO люксіз және жүк салғыш есігіндегі электр сымынсыз, қолжетімді және базалық комплектация болса, MAX жайлылық пен қауіпсіздікті қамтамасыз ететін, оның ішінде премиалды аудиожүйе, жүргізушіге көмек көрсету жүйелерінің толық жинағын және салонды өңдеу опциялары секілді функциялардың кеңейтілген жинағын ұсынады.

Geely Galaxy EX5 MAX-пен бірге күніміз әдеттегідей басталды: күнделікті жұмыстар, кездесулер, жұмыс бабымен әр жерге бару. Жолға шығу үшін автоны ашып, кілтті салон ішіне қойсаңыз болғаны. Ешқандай Start батырмасының және оталдыру құлыптарының қажеті жоқ, Drive режиміне қойсаңыз, электромобиль жүруге дайын. Беріліс қорабы тетігі көптеген жүргізуші үшін үйреншікті жерде емес, рульдің оң жағында, қол созым жерде орналасқан.

Ары қарай жүріс жайлы болу үшін стандартты іс-әрекеттерді орындайсыз: жүргізуші орындығын, айналар мен рөлдің баптауларын реттеу. Айта кету керек, Geely Galaxy EX5 MAX орындықтарында жады бар, сол себепті жүргізуші орындығын қайта-қайта баптаудың қажеті жоқ. Десе де, бір қарағанда керісінше көрінеді, себебі есікті ашқан кезде адамның көліктен шығуы жайлы болуы үшін автоның орындықтары автоматты түрде жылжиды.

Бірнеше минуттан соң орындықтар жайлы ғана емес, бүге-шүгесіне дейін ойластырылғанын түсінуге болады. Қыста орындықтарды жылыту, ал жазда, керісінше, салқындату опциясын қосуға болады; желдету, тіпті массаж да қарастырылған. Авто жасаушылар аяққа ыңғайлы болу үшін алдыңғы орындықтарға оттоманка қосып, жолаушының да жағдайын ойлап қойыпты.

Климат-бақылау опциясын да қайта-қайта жөндеп әуре болмайсыз, бір мәрте ыңғайлы температураны қойып қойса, көлік сол температураны ұстап тұрады. Панорамалы люк арқылы көлік ішіне жарық түсіп тұрады, осылайша, тіпті қала ішінде де жабық кеңістікте келе жатқандай әсер болмайды, қажет болған жағдайда пердешені жауып қоюға болады. 

Жалпы алғанда, көлік интерьері ұстағанға жағымды сұр түсті экотеріден жасалған. Қолда ұстауға ыңғайлы руль де дәл сол материалдан жасалған. Жағымды атмосфера сыйлайтын жарықты да қосып қойсаңыз болады. Көлікте оның түр-түрі бар, бірақ мен жолда алаңдамас үшін оны қоспауды жөн санадым.

Жүргізуші және жолаушы орындықтарының ортасында стақандар қоюға арналған, қажетті заттар сақтауға болатын, тіпті телефонға арналған сымсыз қуаттағышы бар консоль орналасқан. Консольдің төменгі бөлігіне сөре қойылған, оған сөмкеңізді қою ыңғайлы екен.

Жолда музыка тыңдау ерекше ләззат сыйлайды. Flyme Sound аудиожүйесі 18 динамиканың арқасында тұнық әрі жақсы шығады. Егер телефон авто жүйесі синхронизацияланған болса, қоңырау келіп түскен кезде арғы жақтағы кісінің дауысы бас тірегіш арқылы шығады, бұл дауыстың басқаға естілмеуін қамтамасыз етеді.

Алдыңғы панельде түрлі функцияны басқаруға арналған көлемді планшет орналасқан, Geely Galaxy EX5 MAX-та дауыстық басқару функциясын да пайдалануға болады. Пәрмен бойынша көлік терезе немесе люкті ашып-жабуға, орындықтарды жылыту немесе салқындатуға болады; бір сөзбен айтқанда, сізге кофе мен сэндвичтен басқа сұрағаныңыздың бәрін орындайды.

Сонымен бірге қысқы кезеңде рульді, терезені, айналар мен терезе жуғышты, артқы терезедегі терезе сүрткіштерді жылыту секілді маңызды опцияларды атап өтпесе болмайды. Бұл автоны қолмен тазалауға уақыт жұмсамай-ақ, сапар жайлы болуы үшін бәрі дайын болғанша демалып отыра тұруға мүмкіндік беретін жиынтық.

Көлік орнынан қозғалғанда мән берерлік бір жайт – оған әдеттеніп алмайсыз. EX5 MAX қозғалысы жағымды әрі жеңіл музыкамен басталады, бұл музыка көлік салонынан емес, сыртынан естіледі.

Бұл баяу, сағатына 30 км-ден аспайтын жылдамдықпен қозғалғанда айналадағы адамдар жақын жерде көлік құралы бар екенін естуі үшін жасалған. Әсіресе жанармаймен жүретін көліктер секілді емес, аса шуы естілмейтін электрмобильдер үшін өзекті.

Қуаты 218 аттың күшіне тең электрмобильдер бірсарынды қозғалады. Оның бұл қасиетін кептелісте тұрғанда көруге болады – көлік жұлқынбайды және педальді ұдайы бақылауда ұстаудың қажеті жоқ. Автохолд және электронды қол тежегіш артық күш салуды қажет етпейді.

Көліктегі «көмекшілер» де жүргізуші үшін айтарлықтай көмек. Мәселен, егер автомобиль келе жатса, көрінбейтін аймақтарды бақылау қызметі бірден айналадағыларға белгі береді. Егер жүргізуші жолдан тайса, жолақтарда ұстап тұру жүйесі траекторияны жайлап түзеп жібереді. Ал егер жақын маңда басқа көлік не жаяу жүргінші келе жатып, жүргізуші әрекет етіп үлгермесе, ол өздігінен жылдамдықты тежей бастайды.

«Жаман айтпай, жақсы жоқ» дейді, сол себепті көлік өндірушілер автомобиль соқтығысып қалса, темір тұлпар автоматты түрде қуат көзін өшіріп тастайды деп уәде беріп отыр. Бұл көліктің өртену қаупін болдырмайды. Одан бөлек салонда алты қауіпсіздік жастығы бар. Десе де Geely Galaxy EX5-ге сенім артып, өзің ережені сақтасаң болғаны.

Бейімді круиз-бақылау жүйесі трассалар секілді ұзақ жол учаскелерінде көп көмектеседі: көлік арақашықтықты сақтап, көліктер ағынына сай жылдамдықты түсіріп не арттырып отырады.

Көлікке орнатылған камералар да ерекше назарды қажет етеді. Олар әдеттегі 360 емес, 540 градуста көреді және төмендегі кеңістікке де шолу жасай алады. Бұл әсіресе көлікті тұраққа қою, аулаларда немесе тар көшелерде айналу кезінде жақсы көмек. 

Бірақ бастысы камералар жол белгілерін де түсіріп, жылдамдықты шектеу керек кезде немесе көбейіп кеткен жағдайда ескертіп отырады. Бұл айыппұл арқалағысы келмейтіндер үшін таптырмас көмекші. Айтпақшы, қандай жылдамдықпен келе жатқаныңды проекциялық дисплей арқылы бақылап отыруға болады, осылайша барлық қажетті ақпарат көз алдыңда тұрады.

Демалыс күні достарымызбен тауға шығып, Медеудің таза ауасын жұтып келмек болдық. Биікті ұнататындар ары қарай да көтеріле алады, мәселен электркарлармен Шымбұлаққа да баруға рұқсат берілген.

Бірінші әрекетіміз – тауда серуендеуге арналған қажетті заттың бәрін жүк салғышқа салдық. Жүк салғыштың есігінде электржетек бар екенін айта кету керек, сол себепті оны ашып-жабуға қатты күш салудың қажеті жоқ, тек батырманы бассаңыз жеткілікті.

Жүк салғыштың іші де кең болып шықты, сондай-ақ едені мен бүйірінде зат салуға арналған қосымша орын қарастырылған. Қажет болған жағдайда артқы орындықтарды жатқызып, бос орынды кеңейтуге болады, оған ірі сөмкелер немесе спорт жабдықтары еш қиындықсыз сыйып кетеді.

Тағы бір құпияны ашқым келіп отыр – артқы орындықтардың астында жылжымалы жәшік бар, осылайша көлік біз ойлағаннан да сыйымды екеніне көз жеткіздік.

Шағын габаритті болғанымен, тауға шыққанда EX5 MAX сенімді әрі жинақы. Биік клиренс көлікке жолдағы кедергілерден жеңіл өтуге мүмкіндік береді. Көлік астындағы қорғаныш, берік аспасы және төмен түскендегі жүрісі қауіпсіздік сезімін сыйлайды, күш салудың немесе автомобильге қарай ыңғайланудың қажеті жоқ.

Ал енді электрмобильдің жүрегі саналатын басты мәселе – батареясына тоқталсақ. Күнделікті жүрісте Geely Galaxy EX5 MAX өте үнемді көлік екені қуантады. Орташа шығыны шамамен 100 км-ға 18-20 Кв/сағатқа тең, қала ішіндегі жүріс үшін бұл айтарлықтай жақсы көрсеткіш. Толық қуаттаған кезде шамамен 430 км жүруге болады, ал егер қуаты біткелі тұрса, көлік жүргізуші бағытын алдын ала ойластырып алуы үшін белгі береді.

Тез қуатталу – ірі қала қарбаласындағы үлкен артықшылықтардың бірі: 20 минутта батареяны 80 пайызға дейін толықтырып, жұмысыңды жалғастыра беруге болады. Бензинмен салыстырғанда шығын да айтарлықтай аз, бұл отбасы бюджетін үнемдеуге мүмкіндік береді. Тағы бір артықшылық – электрокар иелері Қазақстанда автокөлік үшін салық төлемейтінін еске салғым келеді.

Батарея туралы тағы да айта кетсем. Медеуден түскен кезде мен тағы бір маңызды жайтты байқадым. Егер жоғарыға көтерілгенде тауда серуендеп, қалаға қайту үшін қуат көзі жете ме деп уайымдасам, түскен кезде қорқынышым сейілді. Көлік қуаты көз алдымда өсіп кетті. Энергияны қайтарудың арқасында көлік қозғалыстың өзінен-ақ қуатталып кетті.